ЖЫЛНААМА, 17-СЕНТЯБРЬ: Ырчы Расул Маматкулов туулган күнүн тоо коюнунда белгилеп жатканын айтты

Бүгүн, 17-сентябрда Кыргыздын Эмгек сиңирген артисти Расул Маматкулов 51 жашка толду. SUPER.KG порталы ырчыны куттуктоо максатында байланышка чыкканда, учурда достору менен "Ала-Арча" капчыгайында эс алып жүргөнүн айтты.

"Түнкү саат 12де Орусияда жүргөн уулум Руслан байланышка чыгып, андан соң кыздарым, жубайым куттукташты. Бүгүн таң атпай досторум үйгө келип, мени "Ала-Арча" капчыгайына алып келишти. Азыр жоро-жолдоштордун баары чогулуп, туулган күнүмдү жакшы маанайда тоо коюнунда белгилеп жатабыз. Ал эми кечинде үй-бүлөм менен чогуу болоюн десем, 3 тойго барып ырдашым керек экен. "Жакшы күндө элимдин жакшылыгында болуу - чоң бакыт" деп өзүмдү алаксытып отурам", - деди ырчы күлүп.

Расул Маматкулов тууралуу кызыктуу фактылар:

• Ырчы 1966-жылы 17-сентябрда Жалал-Абад облусунун Сузак районунда туулган;
• 1989-жылы “Жаштар фестивалын” жеңип алып, ошондон тарта чыгармачылыкка баш-оту менен киришкен;
• Ага “Мен бийге чакырсамбы?”, “От болдум” ырлары популярдуулук алып келген;
• Кесиби боюнча опера ырчысы, бирок эстраданы тандаганына өкүнбөйт;
• 16 жашынан бери узун чач менен жүрөт;
• Күрөш менен машыгып жүрүп бутун кокустатып, операция болгон соң спорт менен машыгууну токтоткон;
• Ырчы шоу-бизнес өкүлдөрүнүн ичинен эң кымбат саат тагынгандардын катарына кирет. Анын учурдагы саатынын баасы - 10 миң доллардын тегерегинде;
• Орус улутундагы жубайынан Жанна аттуу кыздуу жана Руслан деген уулдуу болгон соң эки башка жолго түшүп, учурдагы жубайы Катяга үйлөнгөн.

17-сентябрдын жылнаамасы.