ЖЫЛНААМА, 21-СЕНТЯБРЬ: 12 жыл мурун Баяман Эркинбаев атып өлтүрүлгөн

Мындан 12 жыл мурун, 2005-жылдын 21-сентябрь күнү Жогорку Кеңештин депутаты Баяман Эркинбаев киши колдуу болуп каза болгон. Түнкү саат 10:00 чамасында үйүнө кайтып келе жаткан маалда белгисиз адам "Макаров" тапанчасы менен атып качып кеткен. Оор жаракат алган депутат ооруканага жетпей жан берген.

Айта кетсек, Баяман Эркинбаев 1967-жылдын 17-март күнү Сузак районунун Кара-Дарыя айылында жарык дүйнөгө келген. Мектепти аяктагандан кийин Ташкент шаарындагы токой чарба институтуна тапшырып, 1991-жылы бүтүргөн. Спорттук карьерасын ошол жерде ийгиликтүү улантып, эл аралык мелдештерге катышып бир кыйла такшалып, акырында "Баяман-Палван" деген атка да ээ болгон.

Эмгек жолун 1991-жылы "Жаңарык" тамеки ферменттөөчү ишканасында тамекичи болуп иштөө менен баштаган. 1992-жылдан тартып Ош шаарындагы "Палван" кайрымдуулук фондунун башкы директору, 1996-жылдан тартып Ош облустук "Күрөш" федерациясынын, кыргыз-германиялык "Юнион" биргелешкен ишканасынын президенти болуп эмгектенген.