Кыргыз боз үйү Катардагы эл аралык көргөзмөдө көпчүлүктүн кызыгуусун арттырууда

Кыргыздын боз үйлөрү Катарда бүркүт жана куш салуу боюнча өтүп жаткан Биринчи эл аралык көргөзмөдө негизги экспонат катары каралууда. Бул тууралуу Кыргыз Республикасынын Тышкы иштер министрлиги бүгүн, 21-сентябрда кабарлады.

Маалыматта айтылгандай, Доха шаарында өтүп жаткан көргөзмө "Катара" маданий борбору жана куш салууну сүйгөндөрдүн "Аль-Ганнас" ассоциациясы тарабынан уюшулган.

Көргөзмөнүн негизги максаты - куш салууну даңазалоо, ага керектүү буюмдарды, аспаптарды көрсөтүү, жаңы технологияны жана жабдыктарды жайылтуу. Анда унаалардан тартып атайын жабдыктардан бери коюлган.

Иш-чарага Катар, Кувейт, Пакистан, Германия, Испания жана башка бир катар өлкөлөрдүн өкүлдөрү катышууда. Кыргыз мамлекети конок катары катышып, атайын ушул иш-чара үчүн улуттук жасалгалары менен жеткирилген боз үйү тигилген.

"Боз үй кыргыздын тарыхын, маданиятын, салтын, туристтерди тосуп алуу мүмкүнчүлүктөрүн араб өлкөлөрүнө жайылтуу, тааныштыруу максатында тигилди. Боз үйгө келген конокторду улуттук кийим кийген мекендештерибиз боорсок, бал менен комуз, ооз комуз, чопо чоордун коштоосунда тосуп алууда. Мындан тышкары көргөзмөгө келгендер кыргыз жаачыларынын өнөрүнө күбө болуп Кыргыз жери жөнүндө даярдалган фильмди араб тилинде көрүшүүдө. Көргөзмөнүн алгачкы күнүндө эле боз үйдүн жасалгасына кызыгып, киргендердин саны жүздөп саналды. Бул иш-чара 24-сентябрга чейин улантылат", - деп айтылат маалыматта.