Салянованын сотунда акыйкатчы менен прокурорлор кайым айтышты

Бүгүн, 22-сентябрда Бишкек шаарынын Ленин райондук сотунда Жогорку Кеңештин депутаты Аида Салянованын иши каралып, жарыш сөз жүрүүдө. Салянованын коомдук жактоочусу Рабига Сыдыкова жарыш сөздү сүйлөп жатып, сот анын сөзүн кайра-кайра бөлүп жолтоо болууда деп ага ишенбөөчүлүк көрсөткөн.

Сот кеңешме бөлмөсүнө кирип кеткен учурда акыйкатчы Кубат Оторбаев менен прокурорлордун ортосунда кайым айтышуу орун алды. Мындай кырдаалга прокурорлордун акыйкатчынын суранычын четке каккандыгы себеп болду.

Прокурорлор коомдук жактоочунун сөзүн токтотууну талап кылышып: “Жактоочу ишке тиешеси жок, өтө эле туура эмес суроолорду берип, кайра өзү жооп берип жатат”, - деп айтышты. Акыйкатчы алардан айткандарын тактап, кайра кайталап коюуну өтүнгөндө прокурор: "Акыйкатчы бул жерде эч бир тарапка кирбейт", - деп жооп берди.

Сот кеңешме бөлмөсүнөн чыкканга чейин акыйкатчы менен прокурорлор кайым айтышууга жетишти. Кубат Оторбаев жактоочу болгону ишти кенен ачып берүүгө аракет кылып жаткандыгын билдирди.