Өзгөндө социалдык фонддун кызматкерлеринин эмгек акысына чегерилген кошумча жана сый акы боюнча кылмыш иши козголду

Өзгөн районунда социалдык фонддун кызматкерлеринин эмгек акысына чегерилген кошумча жана сый акы боюнча кылмыш иши козголду. Бул тууралуу бүгүн, 22-сентябрда Башкы прокуратуранын басма сөз кызматынан билдиришти.

Маалыматка караганда, жогорудагы факт боюнча Ош облустук прокуратурасы Кылмыш жаза кодексинин 304-беренеси (кызмат абалынан кыянаттык менен пайдалануу) жана 316-беренеси (шалаакылык) боюнча кылмыш ишин козгогон.

"Өзгөн районундагы Социалдык фонд башкармалыгынын жооптуу кызмат адамдары 2014-жылдан 2017-жылга чейин камсыздандыруу төгүмүн чогултуу боюнча жылдык, кварталдык пландарды аткарбастан аталган башкармалыктын кызматкерлеринин эмгек акысына кошумча жана сый акы чегеришкен. Анын кесепетинен мамлекетке 1 миллион 677 миң сом зыян келтирилген. Учурда кылмыш иши боюнча тергөө амалдары жүрүүдө", - деп жазылат прокуратуранын маалыматында.