Бишкекте айдоочу эркек кишини сүзүп кетип, ал ошол жерден каза болду. Айдоочу унаасы менен аны 30-40 метрге чейин сүйрөп кеткенин күбө айтып берди

Бүгүн, 24-сентябрда эртең менен Бишкектеги Абдрахманов жана Бөкөнбаев көчөлөрүнүн кесилишинде Тойота Камри үлгүсүндөгү унаанын айдоочусу катуу ылдамдыкта бара жатып эркек кишини сүзүп кетти.

Окуяга күбө болгон Өмүрбек аттуу окурман SUPER.KG'ге буларды айтып берди. "Таңкы саат 5:40 чамасында унаам менен аталган көчөлөрдүн кесилишинде бара жатсам Тойота Камри үлгүсүндөгү унаа катуу ылдамдыкта келе жатып жолдон өтүп бара жаткан жаш курагы болжол менен 30 жаштагы эркек кишини сүзүп кетти. Унаа жөө жүрүүчүнү 30-40 метрге чейин сүйрөп барып, андан ары токтобостон качып кетти. Ал эми жаракат алган адам ошол жерден каза болуп калды. Мен "Тез жардам" кызматы менен Патрулдук милицияга кабарладым", - деди окуянын күбөсү.

Күбөлөрдүн айтымы боюнча, кырсык болгон жерде унаанын мамлекеттик номуру түшүп калган. Окуя болгон жерден качып кеткен деп шектелген айдоочу түшкө жуук колго түшүрүлгөнү кабарланды.