"Мисс Армения-2017" сулуулар сынагынын жеңүүчүсүнүн таажысын демөөрчүлөр кайтарып алышты

"Мисс Армения-2017" сулуулар сынагынын жеңүүчүсү Лили Саркисяндын таажысын зер буюмдар ишканасы кайтарып алды. Бул тууралуу чет элдик басылмалар жазып чыгышты.

Маалым болгондой, сынак 24-сентябрда өтүп, анын жыйынтыгы боюнча 17 жаштагы Лили Саркисян жеңүүчү аталган. Ага ыйгарылган таажы ошол эле күнү аны жасаган "Artyom’s" зер буюмдар ишканасы тарабынан кайтарылып алынган. Мунун себебин ишкананын өкүлдөрү сынактын уюштуруучулары аларды жетишерлик деңгээлде жарнама кылбай койгондугу менен байланыштырган.

Бул боюнча сынактын уюштуруучусу Гоар Арутюнян: "Биз ишкана менен сүйлөштүк. Таажы кайра ээсине кайтарылып берилет", - деген билдирүү таратса, ишкана таажы эки тараптын тең макулдугу менен алынганын айтып, аны кайтарбасын билдирген.

Чет элдик маалымат булактарында жазылгандай, зер буюмдарын чыгарган "Artyom’s" ишканасы сынакка демөөрчүлүк кылган. Келишим боюнча уюштуруучулар сулуулар сынагынын башынан аягына чейин таажыны кайсы ишкана берерин баса белгилеп, жарнамалап туруу керек эле. Бирок уюштуруучулар жадакалса таажыны жеңүүчүгө тапшырып жатканда да ишкананын атын атоону унутта калтырышкан.

Эске салсак, буга чейин "Түркия сулуусу-2017" сынагынын жеңүүчүсү 18 жаштагы Ытыр Эсен социалдык тармакка жазган посту үчүн алган таажысынан кол жууган.