Орусияда Кыргыз жараны баңгизатын сатууга шектелип кармалды

Орусиянын Москва шаарында Кыргыз өлкөсүнөн барган кыз 100 грамм героин менен кармалды. Бул тууралуу орусиялык басылмалар жазып чыгышты.

Маалыматка ылайык, Москванын түштүк-чыгышында жайгашкан Выхино-Жулебино районунун полиция бөлүмүнө интернетте баңгизат сатууга жарыя берип жаткан кыз тууралуу маалымат түшкөн. Кийин полиция кызматкерлери ал интернет аркылуу жарыя берип алгач кардарларынан акча котортуп анан белгилүү кайсы бир дарекке бекитүү аркылуу сатарын аныкташкан.

Анын кезектеги кардарына баңгизатын бекитип жаткан жеринен кармашып, Кыргыз өлкөсүнүн жараны экенин аныкташкан. Анын жанынан 100 грамм баңгизаты табылып экспертиза кийин анын героин экенин аныктаган.

Ошондой эле маалыматта аталган иш боюнча кылмыш иши козголуп, шектүү убактылуу кармоочу жайда кармалып турганын, ал 15 жылга чейин эркинен ажыратылуусу мүмкүндүгү айтылат.