Аксыда изделип жаткан турист кыз табыла элек

Аксы районуна караштуу Сары-Челек коругунда изделип жаткан турист кыз табыла элек. Бул тууралуу бүгүн, 28-сентябрда Өзгөчө кырдаалдар министрлигинен билдиришти.

Маалыматка караганда, 23-сентябрь күнү Аксы районуна караштуу Кызыл-Туу айыл аймагында жайгашкан Сары-Челек коругуна Израилдин эки жараны жана Франциянын эки жараны туристтик максатта келишкен.

Израиль өлкөсүнүн жарандарынын бири 1993-жылы туулган Городесен Нафад Едипьия жардан кулап, бутунан жаракат алган. Жабырлануучуга 25-сентябрь күнү Кызыл-Туу айыл аймагынын Аркыт айылындагы туристтерге кызмат көрсөткөн адамдар тарабынан жардам көрсөтүлгөн. Ал эми жанында бирге жүргөн турист кыз 1995-жылы туулган Хилла Ливна белгисиз себептерден улам дайынсыз жоголгон.

"Израиль жаранын 17 куткаруучу, 23 милиция кызматкери, жергиликтүү тургундардан 15 адам, Сары-Челек коругунан 5 адам, Израиль өлкөсүнөн 4 куткаруучу издеп жатат. 27-сентябрь күнү караңгы киргендигине байланыштуу саат 19:00дө издөө иштери убактылуу токтотулган. Бүгүн, 28-сентябрда издөө иштери уланууда", - деп билдиришти ӨКМдан.