Сары-Челек коругунда жоголгон израилдик турист кызды дрон менен издешүүдө

Сары-Челек коругунда дайынсыз болуп жаткан израилдик турист кызды издөөгө 77 адам тартылды. Бул тууралуу бүгүн, 29-сентябрда Өзгөчө кырдаалдар министрлигинин маалымат кызматы билдирди.

Маалыматта айтылгандай, алардын 17си ӨКМнын куткаруу отрядынан, РИИБден 15 кызматкер, жергиликтүү тургундардан 30 адам, Сары-Челек коругунан 9 кызматкер жана Израиль мамлекетинен 6 куткаруучу келген.

Дайынсыз болуп жаткан туристтин шеригин куткарган Рысбек Ормоналиевдин SUPER.KG'ге билдирген маалыматына ылайык, туристти учурда дрон менен да издеп жатышат.

"Бүгүн унаа менен ондон ашык куткаруучуларды Сары-Челек көлүнүн жанына жеткирип келдим. Алар андан ары турист кыз жоголгон жерге кетишти. Кечээ издөө тобундагы адамдар турист кыз жоголгон жерге жакын жердеги аскадан кандайдыр бир нерсени көрүшүп, бирок ал жерге бара албагандыктан эмне экенин биле албай коюшуптур. Бүгүн ошол аскадан көрүнгөн нерсе эмне экенин билүү үчүн дрон алып кетишти", - дейт Ормоналиев.

Дайынсыз болуп жаткан туристтин буту сынган шериги Ормоналиевдин үйүндө экенин, абалы жакшы болуп калганын кошумчалады ал.

Эскерте кетсек, Сары-Челек коругунда израилдик 22 жаштагы Хилла Ливне аттуу кыз 6 күндөн бери дайынсыз болуп изделип жаткан.