Канат Исаевдин аялы күйөөсүнүн иши боюнча чечимди угуу үчүн сотко келди

Бүгүн, 2-октябрда Бишкек шаарынын Биринчи Май райондук соту Жогорку Кеңештин депутаты Канат Исаевдин баш коргоо чарасын карамакчы. Сот отуруму мурдагы аскердик соттун имаратында өтүп жатканы белгилүү болду.

Учурда Исаевдин тарапташтары, кесиптештери, туугандары соттун алдына келишүүдө. Алардын арасында Исаевдин аялы менен кызы, депутаттар Алмамбет Шыкмаматов ("Ата Мекен"), Мирлан Жээнчороев, Алтынай Өмүрбекова (экөө тең "Республика-Ата Журт"), Исланбек Сарсейитов ("Кыргызстан") жана башкалар бар.

Милиция кызматкерлери мурдагы аскердик соттун имаратын курчоого алышты.

Эскерте кетсек, депутат Канат Исаев массалык баш аламандык уюштуруу, кылмышка даярдануу жана бийликти күч менен басып алууга даярдык көрүү боюнча Башкы прокуратура тарабынан козголгон кылмыш ишинин алкагында 30-сентябрь күнү кармалган. Кечээ, 1-октябрда депутат 48 саатка камакка алынган болчу.