Бишкектин көчөлөрүн аралай чуркаган уй шаарга тополоӊ салды

Курулушчуларга союлуп бериле турган уй жибин үзүп качып кетип, бир аялды сүздү. Учурда кармалып ээсине кайтарылып берилгени маалым болду. Бул тууралуу Патрулдук милициядан билдиришти.

Айта кетсек, бүгүн борбордук көчөдө уйдун чуркап жүргөндөгү видео интернетке тараган. Анын мүйүзүндө байланган жип бар эле. Чуркап бара жатып бир аялды сүзгөнү айтылган. Ал Бишкек шаардык №4-ооруканасына жеткирилгенин "Тез жардам" кызматы билдирди.

Маалыматка караганда, Бишкектеги курулуш компаниялардын бири курулушчуларга союп берүү үчүн уй алып келишкен. Москва жана Логвиненко көчөлөрүнүн кесилишинде уй жибин үзүп качып кеткен. Киев көчөсүндө унаалардын арасында чуркап жүргөнү видеого тартылган эле. Патрулдук милициянын кызматкери кармап, аны ээсине кайтарып бергени белгилүү болду.