ИИМ: "Вице-премьер Темир Жумакадыров каза болгон жол кырсыгы боюнча кылмыш иши козголду"

Вице-премьер-министр Темир Жумакадыров каза болгон жол кырсыгы боюнча кылмыш иши козголду. Бул тууралуу SUPER.KG'ге ИИМдин маалымат кызматынын башчысы Бакыт Сейитов кабарлады.

Маалым болгондой, учурда кырсыктын себептерин аныктоо үчүн экспертиза дайындалып, тергөө иштери башталды. Сейитовдун айтымында, Жумакадыров бараткан Тойота Прадо унаасы Бишкектен Кара-Балтаны көздөй бара жатканда анын унаасын Бишкекти көздөй келе жаткан КамАЗ сүзгөн. Өкмөттүк аппараттан кабарлашкандай, Жумакадыров Таласка иш сапары менен бара жаткан.

Эскерте кетсек, бүгүн, 7-октябрь күнү эртең менен саат 07:30 чамасында Бишкек-Кара-Балта унаа жолунун Чүй облусунун Сокулук районуна караштуу Садовое айылындагы бөлүгүндө КамАЗ Тойота Прадо унаасын сүзүп, 10-15 метрге чейин сүрүп кеткен. Натыйжада Тойота Прадо унаасынын ичиндеги Темир Жумакадыров, анын жардамчысы жана айдоочусу каза болгон.