Бишкекте "кагазды долларга айлантабыз" деп алдамчылыкка шектелген африкалыктар кармалды

Бишкекте "кагазды долларга айлантабыз" деп алдамчылыкка шектелген Гвинея жана Камерун өлкөсүнүн жарандары кармалды. Бул тууралуу бүгүн, 26-октябрда Ички иштер министрлигинин басма сөз кызматынан билдиришти.

Маалыматка ылайык, кармалган жарандар башкаларга жөнөкөй кагаздарды долларга айландырып жиберүү кызматын сунушташкан. Африкалыктар шаардагы батирлердин биринде кезектеги алданган адамды чакырып, кагаз кантип акчага айланганын көрсөтүшкөндүгү тууралуу маалымат милиция кызматкерлерине келип түшкөн.

"Иликтөө иштеринин жүрүшүндө Бишкектин Калык Акиев көчөсүнөн Камерундун 1964-жылы туулган жараны Б.Ж. жана Гвинеянын 1967-жылы туулган Н.Н. аттуу жараны кармалды. Алардын убактылуу жашап жаткан жеринен медициналык беткаптар, кара түстөгү порошок, түссүз суюктук табылган. Аталган факты боюнча кылмыш иши козголуп, убактылуу кармоочу жайга киргизилди. Учурда иликтөө иштери улантылууда", - деп билдирди басма сөз кызматы.