"Супер сулуу-2012" сынагынын жеңүүчүсү Гузеля Келдибаева турмушка чыкты, үлпөт тойдон фоторепортаж

Бүгүн, 28-октябрда "Супер сулуу-2012" сынагынын жеңүүчүсү Гузеля Келдибаева турмушка чыкты.

Гузеля жана жолдошу Калыстын үлпөт тою Бишкек шаарындагы ресторандардын биринде өтүүдө. Жаш жубайларды куттуктап жакындары жана сахна жылдыздары Акбар Сүйүнбаев, Назми, Мирбек Атабеков жана Каныкей келген. Эстрада жылдызы Назминин аткаруусундагы "Жар-жар" ырынынын коштоосунда кирип келген эки жашты коноктор кол чабуу менен тосуп алышты.

Кызын узатып бир четинен кубанып, бир четинен ичи ачышып турган сулуунун апасы өз сезимдери менен бөлүштү: "Экинчи кызымды турмушка узатып жатам, толкунданып жаткан учурум. Бир ай мурун эле дагы бир кызымды узаткам. Эң негизгиси эки жаш бактылуу болсо ошол бизге чексиз кубаныч", - деп билдирди Мухабат Самудинова.

Түгөйлөр эки жылдан ашуун убакыт кыз-жигит катары сүйлөшүп анан баш кошууну чечишкен. 25-октябрда кыргыздын салты менен кыз узатуу тою болуп өткөн. Эки жашты куттуктап кубанычын тең бөлүшүп келген эстрада жылдызы Каныкей Гузелянын адамдык сапаттары эң мыкты кыз экенин айтып төмөнкүлөрдү билдирди: "Биринчиден, эки жашты куттуктап кетмекчимин. Гузеля менен Калысты аз гана убакыт билсем дагы, алардын кандай мыкты адамдар экенин жакшы билем. Буюрса, үлгүлүү, бактылуу түгөйлөрдөн болоруна ишенем".

Айта кетсек, Гузеля Келдибаева "Супер сулуусу-2012" сынагынын жеңүүчүсү деп аталып Гоага жолдомо утуп алган.