Бишкек ШИИББи: "6 күн мурда төртүнчү кабаттан кулап түшкөн кызды курбусу түртүп жиберген деп шектелүүдө"

Бишкек шаарындагы көп кабаттуу үйдүн төртүнчү кабатынан кулап түшкөн 22 жаштагы кызды курбусу түртүп жиберген. Бул тууралуу SUPER.KG порталына бүгүн, 8-ноябрда Бишкек ШИИББинин басма сөз кызматынан билдиришти.

"Окуя 2-ноябрга караган түнү саат 03:30дар чамасында болгон. Жабырлануучу курбусу жана дагы бир бала менен чогуу спирт ичимдиктерин ичип отурушкан. Ортодо кайым айтышуу орун алып курбусу аны түртүп жибергенде ал кулап кеткен. Учурда 104-берене (ден соолукка атайылап оор залал келтирүү) менен кылмыш иши козголуп, шектүүлөр Бишкек шаарындагы №1-СИЗОдо кармалууда. Сот тарабынан баш коргоо чарасы каралып, алар 2 айга камакка алынды", - деп билдиришти басма сөз кызматынан.

Эскерте кетсек, 2-ноябрда Бишкек шаарынын 11-кичи районундагы көп кабаттуу үйдүн төртүнчү кабатынан 22 жаштагы кыз кулап түшкөндүгү тууралуу "Тез жардам" кызматынан билдиришкен. Дарыгерлер ал оор жаракаттарды алгандыктан оорукананын жандандыруу бөлүмүнө жаткырылып, кийин абалы жакшырып, башка бөлүмгө которулганын кабарлашкан.