Жалал-Абадда үлпөт тойдо жаңжал чыгарып, милицияга каршылык көрсөткөн адамдар коомдук жумуштарга тартылууда

Жалал-Абадда милицияга баш ийбей кызматтык унааларын талкалап жаңжал чыгарган адамдар коомдук жумуштарга тартылууда. Бул тууралуу бүгүн, 11-ноябрда Жалал-Абад ОИИБинин басма сөз кызматынан билдиришти.

8-ноябрда Жалал-Абад шаарында үлпөт тойдо унаалары менен жол кыймылына тоскоолдук жаратып, сөгүнүп, коомдук тартипти бузган жаштарга Патрулдук милициянын 2 кызматкери барып эскертүү берүүгө аракет кылышкан. Бирок мас абалындагы жигиттер баш ийбей, алардын кызматтык унаасынын алдынкы бөлүгүн жана бир күзгүсүн талкалап салышкан. Мындан кийин милиция кызматкерлери кошумча топту чакырып ага да баш ийбеген адамдардын тобун асманга ок атып жатып тынчтандырышкан.

"Бул факты боюнча 25 жаштан 29 жашка чейинки Ноокен районунун 18 тургуну кармалган. Учурда 234-берене (бейбаштык) жана 341-беренеси (Бийлик өкүлүнө карата зомбулук көрсөтүү) менен кылмыш иши козголуп, тергөө иштери жүрүп жатат.

Алардын 13ү Жалал-Абад шаардык соту тарабынан 5 күнгө камакка алынып, коомдук жумуштарга тартылууда жана аталган жаңжалдын уюштуруучулары делген 5 адам 2 айга камакка алынды", - деп билдиришти басма сөз кызматынан.