Мамлекеттик айыптоочу Карганбек Самаковду 19 жылга, Чудинов менен Айдаралиевди 11 жылга эркинен ажыратууну сурады

Бүгүн, 14-ноябрь күнү Бишкек шаарынын Октябрь райондук сотунда 262 гектар жер тилкесин мыйзамсыз трансформациялоо боюнча айыпталгандардын иши каралды. Анда мамлекеттик айыптоочу Карганбек Самаковду 19 жылга, Игорь Чудинов, Искендербек Айдаралиев, Арстанбек Ногоевдерди 11 жылга, ал эми Курманбек Бакиев, Жаныш Бакиев, Кубанычбек Самаков, Аликбай Сариев, Урмат Нурдинов, Эрнис Койчуманов, Абай Таштанбековду 18 жылга эркинен ажыратууну сурады.

Айта кетсек, Башкы прокуратура 2008-жылы Байтик, Лебединовка жана Кара-Жыгач айыл өкмөттөрүндөгү жер тилкелерин "Айыл чарба багытындагы жерлер" категориясынан "Калктуу конуштардын жерлери" категориясына которуу фактысы боюнча кылмыш ишин тергөөнү аяктап, ишти сотко жөнөткөн. Анда Карганбек Самаковго карата "коррупцияны уюштуруу", Жаныш Бакиевге жана Курманбек Бакиевге карата "коррупцияга көмөктөшүү", К.Самаковдун уулу Кубанычбек Самаковго жана алардын 4 адамына карата "коррупцияны кошо аткаруучулук" беренелери боюнча айыптар тагылган.

Өкмөттүн "КРнын Аламүдүн районунун аймагындагы жерлерди которуу жөнүндө" мыйзамсыз токтомун чыгарганы үчүн мурунку премьер-министр Игорь Чудиновго, мурунку биринчи вице-премьер-министр И.Айдаралиевге жана мурунку айыл чарба министри А.Ногоевге карата "кызматтык абалынан кыянаттык менен пайдалануу" беренеси боюнча айып тагылган.