Түштүк Кореянын жылдыздуу түгөйлөрү Ли Мин Хо менен Сюзинин кыз-жигиттик мамилеси үзүлгөнү айтылууда

Түштүк Кореянын белгилүү актёру Ли Мин Хо менен ырчы, актриса жана модель Сюзи 2 жылдан бери кыз-жигит болуп жүрүп жакында эле мамилелерин үзүштү. Мындай маалыматты Ilgan Sports басылмасы өздүк булактарга таянып жазып чыккан.

"Ли Мин Хо менен Сюзи эки башка жолду тандашканына аз гана убакыт болду. Буга жеке мамилелери себеп болгон. Учурда достук мамилелерин сактап калышкан", - деп жазылган анда.

Бул боюнча түгөйлөр расмий билдирүү таратышкан эмес. Бирок Сюзинин агенттиги JYP Entertainment "биз бул маалыматты өзүнөн тактап көрдүк жана чын экенин билдиребиз", - деп билдирген.

Белгилей кетсек, Ли Мин Хо менен Сюзи 2015-жылы кыз-жигиттик мамиледе экенин ачыкташкан. Бирок ушул кезге чейин бир гана жолу чогуу жүргөн кезде журналисттерге кармалып калышкан. Анда түгөйлөр бардан чыгып келе жатышкан эле.