Чүйдө "эки жашар баланы катуу сабап, зордуктады" деп шектелген адамды өмүр бою, жубайын 15 жылга эркинен ажыратуу өкүмү күчүндө калды

Чүй облусунда "эки жашар баланы катуу сабап, зордуктады" деп айыпталган адамдардын үстүнөн чыккан райондук соттун өкүмү күчүндө калды. Бул тууралуу бүгүн, 18-ноябрда SUPER.KG порталына жабыркаган баланын жактоочусу Чолпон Кудайбердиева билдирди.

"Бул ишти кечээ, 17-ноябрда Чүй облустук соту карады. Ал 2017-жылдын 28-январында Аламүдүн райондук сотунун "Жаныбек Тулебеков өмүр бою, аялы Айзада Аккөзова 15 жылга эркинен ажыратылсын" деген чечимин күчүндө калтырды. Сот алардын өспүрүм балдары болгонун эске алып, үй-мүлктөрүн конфискациялоо боюнча райондук соттун чечимин жокко чыгарды", - деди жактоочу.

Эске салсак, 2015-жылдын 11-январына караган түнү шаардагы балдар ооруканасына 2 жашар бала оор абалда жеткирилген. Анын денесинде көптөгөн жаракаттар болгон. Соттук-медициналык экспертиза анын зордукталганын аныктаган. Бул кылмышка шектүү катары баланын атасынын 47 жаштагы бир тууган агасы жана агасынын аялы эки айга камакка алынган. Ушул жылдын 28-февралында ишти Аламүдүн райондук соту карап, агасын өмүр бою, аялын 15 жылга эркинен ажыраткан. Буга макул болбогон айыпталуучу тарап апелляциялык арыз менен Чүй облустук сотуна кайрылган.