Жогорку Сотто Текебаев менен Чотоновдун иши каралып жаткан отурумду видео, сүрөткө тартууга тыюу салынды

Бүгүн, 20-ноябрда Жогорку Сот "Ата Мекен" партиясынын лидери Өмүрбек Текебаев менен мурдагы элчи Дүйшөнкул Чотоновдун ишин карап жатат. Соттук отурумга Жогорку Кеңештеги “Ата Мекен” фракциясынан депутаттар Каныбек Иманалиев, Наталья Никитенко, Бахадыр Сулейманов, коомдук саясий ишмерлер Чолпон Жакупбекова, Камила Талиева, Элмира Иманкожоева катышууда.

Сот отурумга журналисттерди киргизүүгө уруксат берди. Бирок отурумда видео, сүрөттөргө тартуу жана түз алып чагылдырууга уруксат берген жок. Ошондой эле видео жана сүрөткө тарткан журналисттер сот залынан чыгарыла турганын айтып эскертти.

Белгилей кетсек, 16-августта Бишкек шаарынын Биринчи Май райондук соту тарабынан Өмүрбек Текебаев жана мурдагы элчи Дүйшөнкул Чотонов ар бири күчөтүлгөн режимдеги 8 жылга эркинен ажыратылган. Аларга карата мүлктөрү конфискацияга алынсын деген прокурорлордун өтүнүчүн да сот канааттандырып, абактан чыккандан кийин 3 жыл мамлекеттик кызматта иштөөсүнө тыюу салынган.

2-октябрда Бишкек шаардык соту Өмүрбек Текебаев менен мурдагы элчи Дүйшөнкул Чотоновго карата Биринчи Май райондук сотунун өкүмүн күчүндө калтырган.

Буга чейин Биринчи Май райондук соту, кийин Бишкек шаардык соту Текебаев жана Чотоновдун ишине байланышкан соттук отурумдарга журналисттерди киргизгени менен, процессти видео жана сүрөткө тартууга тыюу салган.