ЖЫЛНААМА, 2-ДЕКАБРЬ: Голливуддун белгилүү актрисасы Люси Лью 49 жашка чыкты

Аты-жөнү: Люси Алексис Лью

Туулган жылы: 1968-жыл, 2-декабрь.

Туулган жери: АКШ, Нью-Йорк.

Бою, салмагы: 1 метр 60 сантиметр, 50 килограмм.

Мыкты роль жараткан тасмалары: “Чарлинин периштелери”, “Биллди өлтүрүү”, "Чикаго".

Америкалык актриса, продюсер жана режиссёр Люси Алексис Лью Нью-Йоркто туулган. Атактуулукка "Элли Макбил" сериалындагы ролу аркылуу жетип, ал үчүн "Эмми" сыйлыгына да көрсөтүлгөн. Ошондой эле “Чарлинин периштелери”, “Биллди өлтүрүү”, "Чикаго" тасмаларындагы ролдору менен көпчүлүктүн эсинде бар.

Келечектеги актриса колунда бар үй-бүлөдө төрөлгөндүктөн музыкалык мектепте аккордеондо ойноону үйрөнгөн. Орто мектепти аяктаган соң Нью-Йорк университетине тапшырган. Бир жыл өтпөй кайра Мичиган университетине которулуп, ал жактан Азия элдеринин маданиятын жана тилдерин изилдей баштаган. Люси алгач өзүн актриса катары "Алиса жомоктор дүйнөсүндө" аттуу спектаклде роль жаратып сынап көргөн. Бул окуядан тартып ар кандай сынактарга катышып, америкалык сериалдарда эпизоддук ролдорду жарата баштаган. Көптөгөн тасмаларда роль жараткан актрисаны Голливуддун эң белгилүү жылдыздарынын бирине айланткан Квентин Тарантинонун “Биллди өлтүрүү” тасмасы болгон. Дал ушул тасмадагы ролу үчүн актриса "Мыкты терс каарман" номинациясында MTV Movie Awards сыйлыгына ээ болгон.

Жеке жашоосу

Актриса турмуш курган эмес, балдары жок. 2010-жылдары Люси миллиардер Наом Готтесман менен кыз-жигит мамилесинде болгон. Ошондой эле актриса менен белгилүү боксчу Владимир Кличконун дагы узакка созулбаган мамилелери болгон.

Мындан сырткары чет элдик журналисттер актрисанын азыркы тапта өзүнөн улуу адам менен болгон мамилеси бар экенин жазып келишет, бирок ал адам ким экени тууралуу толук маалымат жок.