Йемендин экс-президенти атып өлтүрүлдү

Йемендин экс-президенти Али Абдалла Салех каза тапты. Бул тууралуу өлкөнүн ИИМине таянып чет элдик маалымат каражаттары жазышты.

Маалым болгондой, 4-декабрь күнү Абдалла Салех Йемендин борбору Сана шаарынан чыгууга аракеттенип жатканда снайпердин огунан набыт болду.

"29-ноябрдан бери Сана шаарында өкмөттүк күчтөр менен козголоңчулар ортосунда болуп жаткан куралдуу кагылышуу токтой элек. Эки жаатка бөлүнүп кагылышкан тараптар оор согуш техникаларын да пайдаланып жатканы айтылууда. Учурда Сананын борбордук көчөлөрү жабылган. Кагылышуулардан 200дөн ашуун адам каза болгон", - деп жазышат басылмалар.

Белгилей кетсек, Али Абдалла Салех 1978-1990-жылдары Түндүк Йемендин президенти болгон. 1990-жылы Йемен Араб Республикасы менен Йемен Элдик Демократиялык Республикасы бириккенде ал президенттик кеңештин төрагасы болуп бекитилген. Төрт жылдан кийин парламент аны Йемен Республикасынын президенти кылып дайындаган. Ал Йеменди 1994-2012-жылдары башкарган.