Дүйнөдө эң кымбат бааланып 450 миллион долларга сатылган картинаны ким сатып алганы белгилүү болду

Дүйнөдө эң кымбат деп эсептелип 450 миллион долларга сатылган картинаны ким сатып алганы белгилүү болду. Бул тууралуу чет элдик маалымат каражаттары жазды.

Нью-Йорктогу аукциондо италиялык сүрөтчү Леонардо да Винчинин кыл калемине таандык 450 миллион долларга "Дүйнөнүн куткаруучусу" сүрөтүн сатып алган сауд арабиялык ханзаадалардын бири Бадер бин Абдулла бин Мохаммед бин Фархан Аль Сауд экени белгилүү болду.

Азыркы тапта картинаны сатып алган ханзаада тууралуу кенен маалымат жок. Айрым такталбаган маалыматтарга караганда картинанын ээси азыркы тапта Сауд Арабиясынын бийлик башында турган Мохаммед бин-Сальмандын жакын досу экени айтылууда.

Ошондой эле өзү мусулман болуп туруп Иса пайгамбар тартылган бул сүрөттү чоң суммадагы акчага сатып алышы Араб өлкөсүндө коомчулуктун нааразычылыктарын жаратышы мүмкүн экендиги айтылууда.

"Дүйнөнүн куткаруучусу" деп аталган сүрөт 1500-жылдарга таандык. 17-кылымда ал Англиянын королу Карл Iдин карамагында болуп, кийин дайыны табылбай калган. Абалы начарлап, бузулган, автору көрсөтүлбөгөн бул сүрөт XX кылымдын башында сүрөт базарларында кайра пайда болгон. Ушул жылдын 15-ноябрында Нью-Йоркто аукцион өткөрүлүп, картина эң кымбат баага сатылган.