Орус жараны ырчы Максимди үй-бүлөсүнүн урашына айыптоодо

Орусиялык ырчы Максим бактылуу үй-бүлөнүн урашына айыпталууда. Бул тууралуу орус басылмалары жазып чыгышты.

Маалым болгондой, "СтарХит" басылмасына 38 жаштагы Людмила Реброва аттуу айым кайрылган. Ал ырчы Максимдин айынан үй-бүлөсү ураганын айтып, аны жолдошу менен жылуу мамиледе деп айыптаган. Ошондой эле ырчы бул тууралуу эч ким билбеши үчүн ар кандай кишилерди жиберип, коркутуп-үркүтүп жүргөнүн кошумчалаган.

"17 жылдык никебиз урады. Мага эч нерсе эмес, балам атасыз калды. Азыр Максим мага эмнелер белгилүү экенин билүү үчүн ар кандай адамдарды жиберип коркутууда. Жакында эле Москвадан убактылуу кетүүнү чечтим. Бул жакка январь айында келем", - деген ал.

Ошондой эле жолдошу, бизнесмен Борис Воробьев ырчы менен мындан бир канча ай мурун учактан таанышып калганын айтып, ошондон тарта анын үй-бүлөсүнө кылган мамилеси өзгөргөнүн билдирген. Мындан улам ушул жылдын 1-декабрында Реброва сотко жолдошу менен ажырашуу тууралуу арыз таштаган.

Ал эми Максим бул боюнча кыска гана билдирүү берген.

"Менин жүрөгүм бош. Менин ырларымды уккан күйөөлөрүн менден кызганган кызганчаак айымдар үчүн мен жооп бербейм", - деген ал.

Белгилей кетсек, Максим мурунку жолдошу Алексей Луговцов менен 2 жыл жашап, 1 кыздуу болгон. Андан соң бизнесмен Антон Петров менен жылуу мамиледе жүрүп, экинчи кызын төрөгөн. Түгөйлөр көп өтпөй мамилелерин үзүшкөнүн ачыкташкан.