Сапар Исаков МАИчилерди шылдыңдоону токтотууга чакырып жатып мисал кылган видео кызуу талкууга түштү

Премьер-министр Сапар Исаков айткан айдоочу жана жөө жүргүнчү тарабынан шылдыңга кабылган Жол кыймылынын коопсуздугун камсыздоо башкы башкармалыгынын кызматкери тартылган видео окурмандар тарабынан порталга жүктөлдү.

Ал видео унаанын ичинен тартылып, Жол коопсуздугун камсыздоо башкы башкармалыгынын кызматкери айдоочу менен сүйлөшүп жаткан жеринен башталат. Анда ал айдоочуга жөө жүргүнчүнү жолдон өткөрбөй койгонун айтып, унаага тиешелүү документтерин көргөзүүнү талап кылат. Айдоочу милиция кызматкерине документтерин көргөзбөстөн жол эрежесин бузганын далилдеп берүүсүн талап кылууну уланта берет. Алардын талашына камера көтөргөн дагы бир адам кошулуп, аталган жөө жүргүнчү ал экенин, ага айдоочу жол бергенин айтып Жол коопсуздугун камсыздоо башкы башкармалыгынын кызматкерин күнөөлөөгө өтүшөт. Милиция кызматкери жөө жүргүнчүгө анын окуя болгон жерден эмес, башка багыттан келгенин айткан. Айдоочу менен жөө жүргүнчү анын сөзүн кулактарына илбей талаш-тартышты уланта бергендиктен аларды коё берип, ары көздөй басып кеткен.

Айта кетсек, кечээ, 14-декабрда премьер-министр Сапар Исаков жол коопсуздугун сактоо боюнча түзүлгөн комиссиянын жыйынында Жол коопсуздугун камсыздоо башкы башкармалыгынын кызматкерлерин шылдыңдоону токтотуу керек деген пикирин билдирген.

"Бир нече күн мурун мен интернеттен бир видеодо көрдүм. Анда Жол коопсуздугун камсыздоо башкы башкармалыгынын кызматкери жолдо бир унааны токтотуп, ага "жөө жүргүнчүнү жолдон өткөрбөй койдуңуз" деп так, сылык мамиле жасап, бардык талапты сактап кайрылып жатат. Айдоочу жол эрежесин бузганын моюнуна алган жок. Ал жерге дагы бир адам келип ал жөө жүргүнчү мен болчумун, мени өткөргөн болчу деп жатат. Кийин алар кетип бара жаткан Жол кыймылын көзөмөлдөө башкармалыгынын кызматкерин шылдыңдап күлүп жатышат. Бул кадамдары менен алар бийлик өкүлүн шылдыңдашууда.

Ал эми алар шылдыңдап жаткан кызматкер ошол жерде коомдук тартипти сактоо үчүн турат. Мындан кийин биз Жол кыймылын көзөмөлдөө башкы башкармалыгынын кызматкерлеринин үстүнөн күлүп шылдың кылууга жол бербешибиз керек”, - деген премьер-министр.