Орусияда полиция кызматкери 19 жаштагы кызды өгөй атасы аткан октон сактап, өзү каза болду

Орусиянын Дивногорск шаарында полиция кызматкери 19 жаштагы кызды өгөй атасы аткан октон денеси менен тосуп, өзү каза болду. Бул тууралуу орус басылмалары жазып чыгышты.

Маалыматка ылайык, окуя 16-декабрдан 17-декабрга караган түнү болгон.

Полиция бөлүмүнө 19 жаштагы кыз чалып, аны өгөй атасы үйүнө киргизбей жаңжал кылып жатканын айткан. Окуя болгон жерге барган эки полиция кызматкери батирден бир кыздын жардам сурап кыйкырганын угушуп, бири үйдүн терезесин кайтарып калып, экинчиси эшиктен батирге кирет. Батирдин ичинде өгөй атасы кызына мылтык такап турганын көргөн полициянын ага сержанты Денис Сумин кызды түртүп жиберген. Ошол учурда мергенчилик мылтыктан аткан өгөй атанын огу полиция кызматкерине тийип оор жарадар болгон. Батирге кирип барган экинчи полиция кызматкери да кылмышкердин аткан огунан жеңил жаракат алып, жабыркаган кыз менен оор жарадар болгон шеригин алып чыгууга үлгүргөн.

Окуя болгон жерге келген башка полиция кызматкерлери үйдүн ичинен октон каза болгон кыздын апасын жана өзүн-өзү атып салган өгөй атасынын жансыз денелерин алып чыгышкан. Ал эми жарадар болгон эки полиция кызматкери ооруканага жеткирилген. Бирок өгөй атанын огунан 19 жаштагы кызды сактап калып, өзү оор жарадар болгон полициянын ага сержанты Денис Сумин каза болуп калган.