Муаммар Каддафинин уулу Сейф аль-Ислам Ливиянын президенттигине ат салышат

Ливиянын мурдагы лидери Муаммар Каддафинин уулу Сейф аль-Ислам өзүнүн талапкерлигин президенттикке көрсөтүүнүн мүмкүнчүлүктөрүн карап жатат. Бул тууралуу чет элдик басылмалар жазып чыгышты.

Ал 6 жыл мурун "Абу Бакр ас-Сиддик" куралдуу тобу тарабынан камакка алынып, быйыл июнь айынын башында Ливия парламентинин жалпы мунапысына ылайык эркиндикке чыкканы кабарланган.

Ливияда президенттик шайлоо 2018-жылдын орто ченинде өтөт. Каддафилердин үй-бүлөсүнүн өкүлү билдиргендей, Сейф аль-Ислам Каддафи өзүнүн даярдап чыккан программасын жакын күндөрдө элге тартуулайт. Программада Ливиянын стабилдүүлүккө алып келүүнүн жол жоболору камтылган.

Буга чейин Сейф аль-Ислам Ливияда саясий ишмердигин баштаганын Каддафилердин үй-бүлөсүнүн жактоочусу жарыялаган.

Белгилей кетсек, 2011-жылдын 20-октябрында Ливиянын мурдагы өлкө башчысы, Муаммар Каддафи өткөөл улуттук кеңештин күчтөрү тарабынан колго түшүрүлүп, өлтүрүлгөн. Каддафи 1969-жылдан 2011-жылга чейин өлкөнүн башында турган.