Суу тазалоочу бөтөлкөнү жарнамалайм деген британиялык актёр бир өлүмдөн калды

Жарнамалык иш-чаранын алкагында Англиядагы Темза дарыясынан суу ичкен британиялык актёр аз жерден өлүп кала жаздады. Бул тууралуу чет элдик басылмалар жазышат.

Маалыматка караганда, актёр Дариус Кэмпбелл Африка аймагына суу фильтрлерин жайылтуу боюнча кайрымдуулук акцияга катышып жаткан.

"Кэмпбелл сууну бактериядан 99 пайыз тазалаган бөтөлкөлөр тууралуу жарнамалык видеороликке тартылып жаткан. Видеого тартуу учурунда Кэмпбелл аталган бөтөлкөлөрдүн бирине Темза дарыясынан суу куйдуруп келип бир нече жолу жуткан. Бир аз убакыттан кийин анын ички органдарында түшүнүксүз кубулуштар башталган. Көрсө, Темза дарыясынан суу куюлган бөтөлкөнүн ичине фильтр салынбай калыптыр", - деп жазылат маалыматта.

Натыйжада, Дариус Кэмпбелл иммунитетин кескин түшүрүп жиберген вируска чалдыгып, бактериялык менингит менен ооруп калган. Актёрдун мээсинде шишик пайда болуп, ал комага түшүп калууга жеткирген.

"Атам ооруканага өз убагында жеткирбегенде, мен өлүп калмак экенмин", - дейт өз сөзүндө актёр.