Шыкмаматовдун соту. Судья өкүмдү угузууда

Бишкек шаарынын Биринчи Май райондук сотунда депутат Алмамбет Шыкмаматов, ишкер Али Юксел жана Эсептөө палатасынын мурдагы аудитору Жусуп Иманалиевдин соту уланууда. Учурда ишти карап жаткан сот Айбек Эрнис уулу өкүмдү угузуп жатат.

Мамлекеттик айыптоочу буга чейин Шыкмаматовду 8, Юкселди 8, Иманалиевди 9 жылга эркинен ажыратып алардын мүлктөрүн мамлекеттин пайдасына конфискациялоону өтүнгөн.

Бүгүнкү отурумда аларга акыркы сөз берилип, алар өздөрүн күнөөлүү эместигин билдиришкен.

Эске салсак, Шыкмаматов 2011-жылы Эсептөө палатасынын аудитору болуп турганда жеке кызыкчылыгын көздөп, аялынын Мерседес Бенц Е320 үлгүсүндөгү унаасын кымбат баага сатуу үчүн "Барат Люкс" ишканасын тендерге катышкандардын катарына кошууну демилгелеген деп айыпталууда. Аталган тендерге 2 фирма катышып, 2011-жылы 5-октябрда жыйынтыкталган. Ишти УКМК тергеп, Биринчи Май райондук сотуна өткөрүп берген.