Өзбекстандык 23 жаштагы кызды уурдап, жакындарынан 31 миң доллар талап кылган деген шек менен үч кыргыз жигит кармалды

Өзбекстандык 23 жаштагы кызды уурдап, аны бошотуу үчүн жакындарынан 31 миң доллар талап кылганга шектелип үч кыргыз жигит кармалды. Бул тууралуу Баткен ОИИБинин маалымат кызматынан кабарлашты.

Маалым болгондой, 20-декабрь күнү 67 жаштагы Т.С. аттуу Өзбекстандын Фергана облусунун Чекшура айылынын жашоочусу Кадамжай РИИБине арыз менен кайрылган. Ал арызында 20-декабрь күнү саат 11.00 чамасында бейтааныш жигит телефон аркылуу байланышып, "сиздин небереңиз Кадамжай районунун Халмион айылында биздин колубузда турат, 31 миң доллар акча каражатын берсеңиз небереңизди бошотуп жиберебиз" деп коркутушкандыгын билдирген.

Аталган факты боюнча иликтөө иштеринин жүрүшүндө белгилүү болгондой, 19-декабрь күнү саат 11:00 чамасында Кадамжай районунун 28 жаштагы М.Д. аттуу Халмион айылынын тургуну 21 жаштагы А.Х. жана 19 жаштагы Э.Ш. аттуу достору менен Халмион айыл аймагы менен Өзбекстандын чектешкен жерине барышкан. Ал жерде туруп Чекшура айылынын 23 жаштагы тургунун тааныш кызы аркылуу чек арага чакырып алып, андан ары уурдап кетишкен.

Бир күндөн кийин телефон аркылуу анын жакын туугандарына чалышып, 31 миң доллар талап кылышкан.

20-декабрь күнү саат 17:00 чамасында алар кызды Кадамжай шаарынын Пүлгөн айылында жайгашкан чек ара постуна алып келишип, таятасынан акча алуу максатында барышкан жеринен кармалышкан.
Бул факты боюнча кылмыш иши козголуп, шектүүлөр убактылуу кармоочу жайына киргизилген. Учурда иликтөө иштери жүрүп жатат.