Элчилик: "Москвада үйдүн чатырында кар күрөп жатып кулап каза болгон Кыргыз жараны боюнча полиция иликтеп жатат"

Орусиянын Москва шаарында үйдүн чатырынан кулап каза болгон Кыргыз жараны боюнча иликтөө иштери жүрүп жатат. Бул тууралуу бүгүн, 25-декабрда SUPER.KG порталына Кыргыз өлкөсүнүн Орусиядагы элчилигинин басма сөз кызматынан билдиришти.

Алардын айтуусуна караганда окуя 24-декабрда саат 11:00дөр чамасында болгон.

"Нурбек Матмусаев аттуу 32 жаштагы Кыргыз жараны Москва шаарынын Кабельная-2 көчөсүндөгү үйлөрдүн биринин чатырындагы карды тазалап жатып кулап кетип каза болгон. Ал ошол жерде көчө шыпыргыч болуп иштеген. Учурда бул иш боюнча полиция кызматкерлери тарабынан иликтөө иштери жүрүп жатат", - деп билдиришти басма сөз кызматынан.

Айта кетсек, буга чейин Орусиянын басылмалары Москва шаарында Кыргыз жараны үйдүн чатырындагы карды тазалап жатып кулап кеткени тууралуу жазып чыгышкан эле.