Интернетке этникалык кыргыздарды ур-токмокко алып жаткан жергиликтүү кыргыздардын видеосу тарады

Интернетке Кыргыз өлкөсүнүн кайсы бир жеринде этникалык делген кыргыздарды ур-токмокко алып жаткан өспүрүмдөр тартылган видео тарады. Учурда ал социалдык тармактарда талкууга алынууда.

Видеодо көрсөтүлгөндөй, окуя күн жылуу мезгилде эле тартылган. Анда бир топ жергиликтүү кыргыз балдар этникалык кыргыздарды ур-токмокко алып, аёосуз сабап жатканын көрүүгө болот.

Видео интернетке тараганда ал төмөнкүдөй текст менен коштолгон:

Баарыбызга маалым, эгемендүүлүктөн кийин Кыргыз-Тажик чек арасында, тагыраак айтканда, Жерге-Тал районунан көптөгөн этникалык кыргыз жердештер көчүп келишкен. Алар Чүй облусунун айылдарында жайгашкан.

"Местный" балдар аларды көргөн жерден тоноп, сабашат экен. Бул басынтуулардан жана токмоктон улам этникалык кыргыз жердештер мектепке, окууга баруудан да качып келишет экен.
Бул сыяктуу окуялардын себепкерлерин ачыкка чыгарып, бул айбанчылыкка, бөлүнүүгө чекит коюуга көмөк берсеңер боло?! Өзгөчө 8-9-класста башталат экен бул кордоолор. Ошондуктан 9-классты эптеп бүтүрүп мектептен жана айылдан узак жакка кетүүгө аракеттенишет экен.

Улуулар көп жакка кайрылса да жыйынтык ала албагандыгын айтышууда… Бул акыбалды оңдоо баарыбыздын колубуздан келет деп ойлойм. Окуя Панфилов районунун Чалдовар айылында болууда деп билдирилди”.

Мындай маалымат жазылганы менен окуя өлкөнүн кайсы аймагында болгону тийиштүү органдар тарабынан официалдуу так айтыла элек.