Сотто прокурорлор Канат Исаевди 20 жылга эркинен ажыратууну суранышты

Прокурорлор Канат Исаевди 20 жылга эркинен ажыратууну өтүнүштү. Бул тууралуу бүгүн, 26-декабрда SUPER.KG порталына Исаевдин жактоочусу билдирди.

Анын айтуусуна караганда, бүгүн, 26-декабрда Бишкек шаарынын Биринчи Май райондук сотунда Жогорку Кеңештин депутаты Канат Исаевдин иши каралган. Анда тараптардын жарыш сөзү орун алып, айыптоочу тарап Канат Исаевдин мүлкүн конфискациялоо менен бирге күчөтүлгөн тартипте 20 жылга эркинен ажыратууну өтүнүшкөн.

Ошондой эле жактоочу соттук отурум 28-декабрда улана турганын айтты.

Эскерте кетсек, Исаевдин Биринчи Май райондук сотунда дагы бир иши каралып жатат. Ал 2008-2010-жылдар аралыгында Токмок шаарынын мэри кызматын аркалап турганда "пара алууга жол берген жана кызмат абалынан пайдаланган" деп айыпталууда. Анда Исаев 2009-жылы Токмок шаарынын мэри болуп турганда 8 гектар жер тилкеси жатаканасы менен бирге 3 миллион 200 миң сомго сатылганы соттук териштирүүдө айтылган. Бирок мамлекет тарабынан түзүлгөн эксперттик топ 2016-жылы экспертиза жүргүзүп, мүлктүн баасын 17 миллион сомдон ашык акчага баалаганы маалым.