Чоң-Алай районунда шамал турак жайлардын чатырын толугу менен учуруп кетти

Бүгүн, 27-декабрь күнү таңкы саат 6:30да Ош облусунун Чоң-Алай районунда катуу шамал катталып, айрым үйлөрдүн чатырлары зыянга учурады. Бул тууралуу ӨКМнын маалымат кызматынан кабарлашты. Маалым болгондой, шамал райондогу Дароот-Коргон айылындагы 5 турак үйдүн шиферлерин, №16-жол тейлөө ишканасынын имаратынын 10 чарчы метр шиферин жана 2 турак үйдүн чатырын толугу менен учурган.

Азыркы учурда келтирилген зыян аймактын Жарандык коргонуу комиссиясы тарабынан жеринде такталууда.

27-декабрга караган түнү Чүй жана Талас облустарында да суу кардын калың түшүшү жана катуу шамалдын болушу айрым райондордо электр жарыгынын өчүрүлүшүнө себеп болду.