Чүйдө түтүнгө ууланып ооруканага түшкөн окуучулардын саны 70тен ашты. Алты окуучу оор абалда жандандыруу бөлүмүндө жатат

Чүйдө түтүнгө ууланган окуучулардын саны 70тен ашты. 6 окуучу оор абалда жандандыруу бөлүмүндө жатат. Бул тууралуу SUPER.KG`ге Саламаттыкты сактоо министрлигинин басма сөз катчысы Жылдыз Айгерчинова билдирди.

"Саат 15:30да биринчи уулангандар келип баштаган. Бүгүн кечке чейин ооруканага кайрылып, 75 адам жаткырылды. Алардын 71и окуучулар, төртөө мугалимдер. Көбүрөөк ууланып калган 6 бала жандандыруу бөлүмүндө жатат. Алардын абалы оор, бирок туруктуу. Дарыгерлер кайрылгандардын баарына медициналык жардам көрсөтүп, катуу көзөмөлгө алууда", - деди Айгерчинова.

Белгилей кетсек, бүгүн, 27-декабрда Чүй районунда дискотека уюштурган мектеп окуучулары түтүнгө ууланган. Аймакта электр жарыгы болбогондуктан окуучулар мектептин спорт залында электр жарыгын бөлүп чыгаруучу генераторду пайдаланышып, анын түтүнүнө ууланып калышкан.