Токмокто каракчылар 25 жаштагы жаранды өлтүрүп, анын апасына, агасына жана кош бойлуу аялына оор жаракат келтиришкен

Чүй облусуна караштуу Токмок шаарында каракчылар 44 жаштагы аялдын үйүнө кирип, улуу баласын өлтүрүп, дагы бир баласы менен келинине жана өзүнө оор жаракаттарды келтиришкен. Бул тууралуу SUPER.KG порталына өздүк булактар билдиришти.

Окуя 27-декабрдан 28-декабрга караган түнү болгон. Анда Токмок шаарындагы үйлөрдүн бирине кирген каракчылар үй ээлерине кол салып, алар катуу жаракаттарды алышкан.

Үйдө 44 жаштагы аялдын 25 жана 22 жаштагы 2 баласы жана 16 жаштагы келини болгон. Каракчылардын колунан катуу жаракат алган 25 жаштагы баласы ооруканадан көз жумган. Үчөө ооруканага оор жаракаттары менен түшкөн.

Чүй ОИИББи аталган факты катталганын тастыкташып, учурда кылмыш иши козголуп, ыкчам иликтөө иштери жүрүп жатканын кабарлашты.

Ал эми дарыгерлер үч жаран тең баштарынан жаракат алышканын, апасы менен 22 жаштагы баласы оорукананын жандандыруу бөлүмүнө, 16 жаштагы келини травматология бөлүмүнө жаткырылганын билдиришти. Ошондой эле келини 2 айлык кош бойлуу экенин кошумчалашты.