Улан Саляновдун өлүмүнө шектелип кармалган адам анын үйүнө барып окуя кандай болгонун көрсөтүп берди

Депутат Аида Салянованын иниси Улан Саляновдун өлүмүнө шектелип кармалган адам бүгүн, 28-декабрда маркумдун үйүнө барып окуя кандай болгонун тергөөчүлөргө көрсөтүп берди. Бул тууралуу SUPER.KG'ге Улан Саляновдун жакындары кабарлашты.

Ал эми Аида Салянова кармалган адам боюнча өз оюн билдирип, аны инисин өлтүргөн адамдардын бири деп саноодон күмөн санай турганын айтты.

ИИМдин маалыматы боюнча, 27-декабрь күнү кечинде Саляновдун өлүмүнө шектүү катары 1986-жылы туулган Бишкек шаарынын Э.О. аттуу тургуну кармалып, Бишкек ШИИББинин убактылуу кармоочу жайына киргизилген. Шектүү кармалган учурда анын жанынан Салянов атылган "Макаров" тапанчасы 17 огу менен табылган.

"Шектүү алдын ала сурак учурунда күнөөсүн моюнуна алды. Анын жанынан табылган тапанча экспертизага жиберилди. Учурда Саляновдун өлүмүнө катыштыгы бар адамдарды кармоо үчүн издөө жана тергөө иштери улантылып жатат", - деп билдиришкен ИИМден.

Эскерте кетсек, ушул жылдын 6-ноябрына караган түнү депутат Аида Салянованын 42 жаштагы иниси Улан Саляновду Бишкекте белгисиз адамдар өз үйүнөн атып кетишкен.