Кадамжайда кызды уурдап, 31 миң доллар талап кылган жарандар кармалды

Кадамжай районунда милиция кызматкерлери адам уурдоого шектүү делген үч жаранды кармашты. Бул тууралуу ИИМдин маалымат кызматы билдирди.

Маалыматка ылайык, 20-декабрда Баткен облусунун Кадамжай районуна караштуу ИИМдин нөөмөт бөлүмүнө өзбек улутундагы жаран арыз менен кайрылган. Ал арызында 23 жаштагы небересин белгисиз адамдар уурдап телефон аркылуу чалып 31 миң доллар суммасындагы акча талап кылгандыгы тууралуу билдирген. Ыкчам иликтөөнүн негизинде уурдалган кыз кылмышкерлердин телефон чалуусуна алданып эшиктин алдына чыккан. Ошол учурда белгисиз адамдар кызга күч колдонуп унаага салып изин жашырып кеткен. Уурдалган кыз кийинчерээк Кадамжайда барымтада болгону белгилүү болгон. Кылмыштуу топ жолугушууну Кадамжай районунун мамлекеттик чек арага жакын жерине белгилешип жолугушууда кызды туугандарына кайтарып берип акчаны алууга аракет кылышкан.

"Кылмышка шектүүлөр Hyundai үлгүсүндөгү унаа менен келишкен. Ошол учурда ИИМдин кызматкерлери ишти токтотуу үчүн кылмыштуу топту колго түшүрүүгө аракет көрүшкөн. Жыйынтыгында талап кылынган акча берилбей үч шектүү кармалган. Ал эми уурдалган кыз анча алыс эмес жерде Дэу Нексия үлгүдөгү унаада кармоодо турган жеринен табылды", - деп жазылат маалыматта.

Бул факт Кадамжай РИИБинде катталып, милиция кызматкерлеринин иликтөөсүнүн негизинде Кылмыш-жаза кодексинин 123-беренесинин 2-пункту (адам уурдоо) жана 125-берененин 2-пункту (кулчулукта кармоо, бирөөнүн эмгегин мажбурлап колдонуу) боюнча кылмыш иши козголгон.

Такталган маалыматка ылайык, шектүү жарандар Баткен облусунун Кадамжай районунун 1989-жылы туулган Д.М. жана 1996-жылы туулган Х.А., 1998-жылкы Ш.Э. аттуу тургундары экени белгилүү болду.

Учурда бул кылмышка тиешелүү иликтөө иштер уланып сурак жүрүүдө.