ТЕСТ: Жээнбеков бокалды кайсы колунда кармап турду? Жаңы жыл майрамына арналган тест

"Ала-Тоо" аянтында майрамдык кече өтүп жаткан учурда өспүрүмдөр менен иштөө боюнча инспекторлор адашып калган 27 баланы табышкан. Инспекторлор өспүрүмдөрдүн баарынын ата-энелерин таап, балдарын өткөрүп берди.

Жаңы жыл кечесинен кийин Ош шаарынын борбордук аянтынан 40 куб таштанды чыгарылган. Шаарды тазалоону "Ош-Тазалык" ишканасынын жумушчулары таң эрте саат 04:30да баштаган. Борбордук аянтты тазалоого 35 жумушчу, 2 техника тартылган.

2018-жылдын январь айынан тарта Түркмөнстанда кара түстөгү унааларды эксплуатациялоого тыюу салуу чечими кабыл алынган. Буга байланыштуу кара түстөгү унааларды полиция кызматкерлери көчөдө токтоп турган жеринен эле камакка алышууда. Бажы кызматкерлери ак түс бакыт чакырат деп гана түшүндүрүшкөнү айтууда.

31-декабрдан 1-январга караган түнү Чүй облусунун Беловодск айылындагы жаңы жылдык балаты күйүп кеткен. Алдын ала маалыматтарга караганда, өрт салют, фейерверктерди балатынын жанында жардыргандан улам келип чыккан.

1-январга караган түнү Бишкектеги борбордук "Ала-Тоо" аянтында жаңы жылдык иш-чара өткөн. Саат 20:00дө башталган кеченин соңунда ири экран аркылуу президент Сооронбай Жээнбеков куттуктоо сөзүн сүйлөгөн. Андан соң аянтка чогулган шаар тургундарын жана конокторду көп күттүргөн Жаңы жылдык фейерверк атылган.

31-декабрдан 1-январга караган түнү өлкө аймагында 309 ымыркай жарык дүйнөгө келди. Төрөлгөндөрдүн 141и уул болсо, 168и кыз болгон. Эң көп төрөт Ош облусунда (80), Бишкек шаарында (58), Жалал-Абад облусунда (47) катталган. Ал эми операциялык жол менен 24 наристе жарык дүйнөгө келди.

1-январдан баштап ЕАЭБдин Бажы кодекси күчүнө кирди. Бул кодекс чек арадагы бажы жол-жоболорун жөнөкөйлөтөт. Мындайча айтканда, сунушталып жаткан чек ара тыгындарын чечүүнүн ыӊгайлуу механизмдеринин бири болуп саналат. Мисалы, буга чейин чек арадан товар өткөрүү мөөнөтү 2 сутка болсо, Бажы кодекси ратификациялангандан кийин ал 4 саатка чейин кыскартылмакчы.

Дубайдагы жаңы жылдык лазердик шоу Гиннестин дүйнөлүк рекорддор китебине кирди. 31-декабрдан 1-январга караган түнү Дубайда майрамдык фейерверк атылган жок. Анын ордуна 10 миңдеген адамдар эң бийик имараттардын бири Бурж Халиф мунарасынын бетине түшүрүлгөн ири лазердик шоу көргөзмөсүнө күбө болушту. Бул шоу Гиннестин рекорддор китебине "Бир имараттагы ири лазердик жана музыкалык шоу" аталышында кирет.

Президент Сооронбай Жээнбеков өлкө элин Жаңы жылы менен куттуктап жатып, бокал кармап турган жок.

2018-жылдын 1-январына чейинки аралыкта ИИМдин өздүк курамы күчөтүлгөн тартипте иш алып барды. Коомдук коопсуздукту камсыздоо үчүн республика аймагында 8 500дөн ашуун милиция кызматкерлери, Бишкек шаарында 2 500дөн ашуун милиция кызматкери иштеди.

Орусияда энергетикалык суусундуктарды чыгарууга жана сатууга тыюу салган мыйзам 2018-жылдын 1-январынан тарта күчүнө кирди. Бул мыйзам Мамлекеттик Думада талкууланып жатканда энергетикалык суусундуктар көбүнчө жаштар арасында өзгөчө популярдуулукка ээ экени айтылып, алардын ден соолугуна терс таасир тийгизери баса белгиленген.

30-декабрда Өмүрбек Бабанов депутаттык мандатын тапшырып, саясаттан биротоло кете турганын жарыялаган. Ал бизнес менен алектене турганы айтылды. 2017-жылдын октябрь айындагы президенттик шайлоодон кийин Өмүрбек Бабанов өлкөдөн чыгып кеткен боюнча кайтып келе элек. Айрым маалыматтарга караганда, ал шайлоодон кийин Орусияга дарыланууга кеткен.

1-январга караган түнү Чүй облусунун Москва районунда белгисиз адамдар бир үй-бүлөнүн үйүнө кирип, 2 адамды атып өлтүрүп, 1 адамды оор жарадар кылышкан. Кырсык катталган учурда үй ичинде 2 айлык наристе да болгон. Бул кылмышка шектүү катары 19-23 жаштагы жарандар кармалып, убактылуу кармоо жайына камакка алынышты.

"Мамлекеттик жөлөк пулдар жөнүндө” мыйзамына ылайык, жаңы төрөлгөн балага 4 миң сом сүйүнчү пул бериле баштайт. Бул мыйзам боюнча, 3 жашка чейинкилерге ай сайын 700 сомдон, үчүнчү баладан баштап 3-16 жашка чейинки балдарга айына 500 сом жөлөк пул бериле башташы да керек болчу. Бирок өкмөттүн суранычы менен Жогорку Кеңеш жөлөк пулдарды берүү мөөнөтүн 3 айга жылдырды.