Бишкекте эки жаран үйгө кирип, ээсин коркутуп акчасын жана уюлдук телефонун карактап кетишти

Бишкекте тургундун үйүнө кирип, 50 миң сом акчасын жана уюлдук телефонун коркутуп алып кетишкен деп шектелип 2 адам кармалды. Бул тууралуу SUPER.KG порталына Бишкек шаардык ички иштер башкармалыгынын басма сөз катчысы Адыл Оморов билдирди.

Маалыматка ылайык, кылмыш 7-январь күнү кечки саат 10дор чамасында Бишкектин Биринчи Май районунда болгон. Иликтөө иштеринин жыйынтыгында кылмышка шектүү катары Сокулук районунун 27 жана 20 жаштагы 2 тургуну кармалган.

"Жабырлануучу бизге арыз менен кайрылган. Анда белгисиз 2 адам үйүнө кирип келип телефонун жана 50 миң сомун опузалап алып кетишкен. Анын негизинде Кылмыш-жаза кодексинин 168-беренеси (каракчылык) боюнча кылмыш иши козголгон. Учурда кылмышка шектүүлөр убактылуу кармоочу жайга киргизилген", - дейт Оморов.