Токмокто бир үй-бүлөгө кол салып, 2 баласын өлтүрүп кеткен адамдар кармала элек

Токмокто бир үй-бүлөгө кол салып, 2 баласын өлтүрүп кеткен адамдар кармала элек. Бул тууралуу бүгүн, 11-январда SUPER.KG порталына Чүй ОИИББинин басма сөз кызматынан билдиришти.

Алардын айтуусуна караганда, учурда кылмышка шектүүлөрдү издөө иштери күчөтүлгөн тартипте уланууда. "Бул факты боюнча кылмыш иши ачылып, кол салгандарды издөө иштери жүрүүдө. Аларды кармоо өзгөчө көзөмөлгө алынган", - деп билдиришти басма сөз кызматынан.

Эскерте кетсек, 2017-жылдын 28-декабрь күнү таңкы саат 6:30 чамаларында Токмок шаарында белгисиз адамдар 44 жаштагы Диля К. аттуу аялдын үйүнө кирип, өзүн, эки баласын жана 16 жаштагы келинин сабап из жашырып кетишкен. Алган жаракаттарынан улам үй-бүлө мүчөлөрү Токмок шаарындагы ооруканага жеткирилишкен. Бирок 24 жаштагы баласы ооруканага келери менен, ал эми 22 жаштагы баласы 29-декабрда каза болуп калган.

Ал эми Токмок шаардык ооруканасынан 16 жаштагы келини абалы жакшы болуп калгандыгына байланыштуу үйүнө чыгарылганын, ал эми Диля К. болсо жандандыруу бөлүмүнөн травматология бөлүмүнө которулганын билдиришти.