Бишкекте үй тоноого шектелип эки жигит кармалды. Алар 43 миң сомдук буюмдарды алып кетишкен

Бишкекте тургундун үйүнө кирип, үй ээсин бычак менен коркутуп, уюлдук телефонун, күмүш зер буюмдарды жана төш белгилерин уурдап кетүүгө шектелип 2 жаран кармалды. Мындай маалыматты Бишкек ШИИББинин басма сөз кызматы билдирди.

"Биринчи Май РИИБине Бишкектеги жаңы конуштардын биринин тургуну арыз менен кайрылган. Анда 15-декабрдан 16сына караган түнү белгисиз 2 адам үйгө кирип, бычак менен коркутуп, баалуу буюмдарды алып кеткендиги тууралуу жазылган. Уурулар үйдөн уюлдук телефон, күмүш зер буюмдарды, акча жана төш белгилерин уурдап кетишкен. Булардын жалпы чыгымы 43 миң сомду түзгөн. Аталган арыздын негизинде кылмыш иши козголуп, издөө иштери башталган. Бул кылмыш ишине шектелип, Кемин районунун 1991-жылы туулган Ж.А. жана 1998-жылы туулган Э.М. аттуу тургундары кармалышты", - деп жазылат маалыматта.

Колго түшкөн шектүүлөр учурда убактылуу кармоочу жайга камалып, сурак беришүүдө.