ЖЫЛНААМА, 12-ЯНВАРЬ: Жүрөккө жеткен кайрыктардын автору, кайталангыс талант Рыспай Абдыкадыров көзү тирүү болгондо 77 жашка чыкмак

Кыргыз музыкасына зор салым кошуп, кайталангыс кайрыктарды жараткан белгилүү обончу, аткаруучу Рыспай Абдыкадыров көзүү тирүү болгондо бүгүн, 12-январда 77 жашка чыкмак.

Белгилүү обончу Жолон Мамытовдун "Издейм сени" аттуу ырына жан киргизип, ар бир уккан адамдын жан дүйнөсүнө бүлүк салган чыгарманы жаратуу Абдыкадыровго гана таандык өзгөчө таланттай. Обончунун ар бир чыгармасы лирикалуу маанайга ээ, обону мааниси терең сөздөр менен айкалышып тургандай туюлат.

Рыспай Абдыкадыров 1941-жылы 12-январда Ош облусуна караштуу Кара-Кулжа районунун Кызыл-Булак айылында туулган. Бала кезинен музыкага шыктуу талант 1963-жылы Ош педагогикалык окуу жайын бүтүргөн.

Белгилүү обончу өзүнүн чыгармачылык жолун Кара-Кулжа элдик театрында, андан соң Жалал-Абад театрында баштаган. Ошол жерде иштеп жүргөн мезгилде кургак учук оорусуна кабылып, оорусуна байланыштуу борбордогу филармонияга келип иштеп калган. Музыка тармагындагы инсандардын айтымында, Рыспай эч кимге окшобогон оригиналдуу композитор болгон. Ал музыкант эле эмес, торгойдун үнүндөй кубулжуган ырчылыгы, аккордеондо мыкты ойноо өнөрү, обонго тексттерди төп тандоого кудуреттүүлүгү менен айырмаланган.

Кыргыз музыка дүйнөсүндө чоң из калтырган атактуу обончу, аткаруучу Рыспай Абдыкадыров "Алмашым", "Түгөйүм", "Сагынуу", "Издейм сени", "Алтынчы күнү кечинде", "Жүрөктү кетпе жаралап" деген ырлары менен калың элдин катмарына сиңип, улуу-кичүүнүн жүрөгүнөн орун алган.

Рыспай Абдыкадыров 1994-жылы 12-сентябрда көпкө созулган оорунун айынан көз жумган. Көз жумганына сегиз күн болгондо гана ырчынын эмгеги бааланып, 1994-жылы 20-сентябрда "Эл агартуунун отличниги" деген наам берилген. Ошол эле жылдын ноябрь айында Ош филармониясындагы Кара-Кулжа музыкалык окуу жайына ысымы ыйгарылган. 1997-жылы 12-январда Сулайман-Тоодогу ырчынын бейитине эстелик коюлуп, кийин Ош филармониясынын алдына эстелиги орнотулуп, коомдук фонд да уюштурулган. Рыспай Абдыкадыровго Кыргыз Республикасынын Эл артисти наамы тирүү кезинде берилбей калган.

12-январдын жылнаамасы.