Ысык-Көлдө "тургундун таманына үтүк басып кыйнап, акча талап кылган" деп шектелген 5 адам кармалды

Ысык-Көл районунда "тургундун таманына үтүк басып кыйнап, акча талап кылган" деп шектелген 5 адам кармалды. Бул тууралуу SUPER.KG'ге 12-январда Ысык-Көл ОИИБинин маалымат катчысы Сталбек Усубакунов кабарлады.

Анын айтымында, райондогу Сары-Камыш айылынын 25 жаштагы тургуну кыйноого кабылганын айтып милицияга 2017-жылдын 24-декабрында арыз менен кайрылган.

"Анын айтымында, ошол эле күнү таңкы саат 5:00 чамаларында үйүнө үч жигит беткапчан кирип келип акча талап кылышкан. Акча бербей каршы болгондо ысытылган үтүктү таманына басып кыйноого алып, андан кийин үйүнөн уюлдук телефонун, 4 миң сом акчасын жана алтын буюмдарын алып чыгып кетишкен. Факты боюнча кылмыш иши козголуп, издөөнүн жыйынтыгында шектүү катары 20-25 жаш курактагы 5 жигит кармалып, убактылуу кармоочу жайга камакка алынды. Алар Чүй, Нарын жана Талас облустарынын тургундары болуп чыкты. Шектүүлөрдүн үчөө үйгө кирген болсо, экөө сыртта байкоо салып турган", - деди Усубакунов.