ТЕСТ: Тирүүлөй көмүлгөн адамдардын экспонаттары кайсы музейде сакталат? Эң узун динозаврды кайсы музейден көрсө болот?

Кыргыз Республикасынын президенти Сооронбай Жээнбеков 2018-жылы 12-январда Мамлекеттик тарых музейин калыбына келтирүү иштеринин жүрүшү менен таанышып чыккан. Аткарылган жумуштар менен таанышып чыккан президент музейди керектүү экспонаттар менен толуктоо боюнча сунуштарын айткан.

Сүрөттө Париждин борборунан, Сена дарыясынын оң жээгинен орун алган "Лувр" музейи. Ал 1793-жылы түзүлгөн. Ээлеген аянты – 160 106 чарчы метр, мындагы залдардын саны 200гө жетет жана алар 7 бөлүмгө бөлүнгөн. Экспонаттарынын саны 300 миңден ашуун.

"Музей" грек тилинен "Музалар үйү" деп которулат. Муза - бул грек мифологиясында искусство жана илимди колдоочу кудайы. Ошондой эле, Муза деп эргүүнүн жана чыгармачылыктын булагын аташат.

Бишкек шаарындагы Мамлекеттик тарых музейинде экспонат катары сакталып турган мумия 2017-жылы 14-октябрда Баткен облусунун Кара-Булак айылындагы Мактым-Гөр деген жерге коюлган. Окумуштуулардын айтымында, белгисиз кыздын мумиясы 1959-жылы Баткен аймагынан табылган. Кийинчерээк көмүлгөн жеринен казып алынып, Бишкектеги Тарых музейине өткөрүлгөн.

"Сулайман-Тоо" музей-комплекси 1949-жылы түзүлгөн. Анда тарыхка, археологияга, искусствого байланыштуу 33 миңден ашуун экспонат сакталат. Музей-комплекси эки негизги тема боюнча бөлүнөт: тарых жана аймактын жаратылышы.

Ватикандагы музей - дүйнөдөгү эң ири музей болуп саналат. Анда 1400 зал, 50 миң экспонат бар. Бардыгын көрүп чыгыш үчүн 7 чакырым басып өтүш керек.

Маданият, маалымат жана туризм министрлигинин маалыматы боюнча, Тарых музейинде жоголгон тарыхый баалуу экспонаттардын саны 503кө тең. Анын ичинде 1970-2000-жылдарга чейин жоголгондору бар. Алардын арасында 358 археологиялык предметтер, 2 медаль, 2 төш белги бар. Бул боюнча Маданият маалымат жана туризм министрлиги 2013-жылы маселени карап чыгып тийиштүү адамдардын баарын кызматтан бошоткон. Эң баалуу буюмдар таза алтындан турган ордендер болгон.

"Музейдеги түн" фантастикалык комедиясы АКШнын Нью-Йорк шаарындагы табият таануу музейинде тартылган. Тасма 2006-жылы кинотеатрларда көрсөтүлө баштаган.

Мексиканын Гуанахуато шаарындагы музейде тирүү көмүлгөн 111 эркектердин, аялдардын жана жаш балдардын жансыз денелери экспонат катары сакталат. 1833-жылы шаарда холера эпидемиясы күч алып көптөгөн адамдар тирүү көмүлгөн эле. 1865-1958-жылдары алардын туугандары көрүстөндөгү орунга салык төлөй албагандыктан сөөктөрдү жерден казып алууга мажбур болушкан.

Бишкектеги Чыңгыз Айтматовдун мемориалдык үй-музейи 2014-жылы 7-апрелде жубайы Мария Айтматова, кызы Ширин жана уулу Элдардын демилгеси менен ачылган. Бул үйдө жазуучу 32 жыл жашаган.

2000-жылы 23-октябрда Кытайда археологдор музыкалык аспаптар музейин табышкан. Андагы экспонаттар 2 миң жыл мурун Хань династиясынын мезгилинде жасалган. Көп жыл өткөнүнө карабай дээрлик бардык 150 музыкалык аспап жакшы абалда сакталган.

Семён Афанасьевич Чуйковдун "Советтик Киргизиянын кызы" белгилүү сүрөтүнүн түп нускасы Москвадагы Мамлекеттик Третьяков галереясында сакталат. Ал 1948-жылы тартылган. 1950-жылы Чуйков Кыргыз жергесиндеги көркөм сүрөт музейи үчүн сүрөттүн автордук копиясын жасап берген.

Глор психиатриялык музейи АКШнын Сент-Жозеф шаарында жайгашкан. Башында 1874-жылы дарылоочу жай катары иштей баштаган. 1968-жылы дарыгер Жорж Глордун менчигине өткөндө, ал мекемени музейге айландырган. Анда психикалык жактан ооруган адамдарды дарылоо ыкмалары, дарылоодо колдонулган буюмдар көрсөтүлгөн.

Германиянын Берлин шаарында табият таануу музейинде узундугу 12,6 метрге жеткен Бранхиозаврдын экспонаты бар. Ал "Гиннесстин рекорддор китебине" киргизилген. Мындан тышкары бул музейде Танзанияда 20-кылымда табылган динозаврлардын көптөгөн сөөктөрүн да көрсө болот.