"Айтматовдун дүйнөсү, дүйнө Айтматовсуз" аттуу фильмдин сценарийи даяр, тартуу үчүн каражат изделүүдө

Кыргыз Эл жазуучусу Чыңгыз Айтматовдун 90 жылдыгына карата "Айтматовдун дүйнөсү, дүйнө Айтматовсуз" аттуу толук метраждуу фильм тартылат. Кинонун сценарийи даяр. Учурда тасманы тартууга каражат изделүүдө. Бул тууралуу бүгүн, 19-январда SUPER.KG порталына белгилүү кинорежиссёр Бакыт Карагулов билдирди.

"Тасманы өзүм тартам. Айтматовдун ролун өзүнүн уулу Эльдар Айтматовго берели деп жатабыз. "Жамиляда" Айтматовдун жазганы бар "Мен бул сүрөттү али тартып бүтө элекмин, кандай болуп чыгат билбейм" деген. Тасманы мына ушундан баштайбыз. Чыӊгыз Айтматовдун эл билбеген, эч ким укпаган сандыкта катылган фактыларын алып чыкканы жатабыз. Тасманы тартууга уулу Аскар Айтматов өзү жардам берип жатат. Мындан сырткары "Түрксой" уюмуна кат жөнөттүк. Себеби быйылкы жылды аталган уюм "Айтматов жылы" деп жарыялады.

Акыркы жолу Айтматовду көрүп, сүйлөшүп калгандар бул Казак өлкө башчысы Нурсултан Назарбаев, Азербайжандын эл башчысы Ильхам Алиев, Татарстандын мурунку президенти Минтимер Шаймиев болушкан. Бизге жазуучу алар менен кандай маселени талкуулап, эмнелерди сүйлөшкөнү кызык. Мунун баары фильмде камтылат. Ошол үчүн тасманын аталышын "Айтматовдун дүйнөсү, дүйнө Айтматовсуз" деп атадык", - дейт Карагулов.

Ал белгилегендей, аталган тасманын сценарийин кинорежиссёр Бакыт Карагулов, адабиятчы Абибилла Пазылов, мурдагы министр Түгөлбай Казаков жазып чыгышкан. Долбоордун координатору Аскар Айтматов.