Бишкекте сүйгөнүнө үлпөт көйнөгүн сатып бергенге акча таппай атайын ичин кесип, каракчылык боюнча милицияга арыз жазган жигит соттолду

Бишкек шаарынын Октябрь райондук соту сүйгөн кызына үлпөт көйнөгүн сатып бере албай өзүнө-өзү кол салып, кийин "мени тоноп кетти" деп милицияга арызданган 23 жаштагы жигитти 1 жылга эркинен ажыратты.

Соттун өкүмүнө ылайык, аталган окуя 2017-жылы 12-октябрда орун алган. Анда Бишкек шаарынын 23 жаштагы С.М. аттуу тургуну С.А. аттуу кызга үйлөнөм деп ага үлпөт көйнөгүн сатып бермек болот. Бирок ал үлпөт көйнөктү сатып бергенге акчасы жок болгондуктан сүйлөшкөн кызынын батирине барып, кайра чыккандан кийин лезвия менен өзүнүн ичин өзү тилип салган. Кийин сүйлөшкөн кызына телефон чалып, ага белгисиз адамдар кол салып тууганынан карызга алган 10 миң 300 долларын тоноп кетишкенин айткан.

Ал жерге дарыгерлер чакырылып, ага медициналык жардам көрсөтүлүп, С.М. милицияга да арыз менен кайрылган. Бул боюнча иликтөө иштери жүргүзүлүп, натыйжада анын берген көрсөтмөлөрү жалган экени аныкталып, өзү да моюнуна алган.

Кийин 2017-жылдын 20-ноябрында анын ишин Бишкек шаарынын Октябрь райондук соту карап, 329-берене (атайлап жалган билдирүү жасоо) менен күнөөлүү деп тапкан. Соттун чечимине ылайык, С.М. сот залынан камакка алынып, 1 жылга жатак абагына кесилген.