Бишкекте кафелердин биринде идиштерди сындырып, коомдук тартипти бузган Экономикалык кылмыштуулукка каршы күрөшүү боюнча кызматтын өкүлү кармалды

Бишкекте милицияга каршылык көрсөткөн Экономикалык кылмыштуулукка каршы күрөшүү боюнча кызматтын өкүлү кармалды. Бул тууралуу бүгүн, 22-январда Бишкек шаардык ички иштер башкы башкармалыгынан билдиришти.

Маалыматка караганда, 21-январь күнү саат 00:20 чамасында 102ге Бишкектеги кафелердин биринде мас абалындагы адам идиштерди сындырып, коомдук тартипти бузуп жатканы боюнча маалымат келип түшкөн.

"Окуя болгон жерге милиция кызматкерлери барышып, 1984-жылы туулган Т.Кны кармашкан. Андан соң ал милиция бөлүмүнө алынып келген. Ал жакта милиция кызматкерлерин сөгүп, коркутуп, каршылык көрсөткөн. Учурда аталган факт боюнча Кылмыш-жаза кодексинин 341-беренеси (бийлик өкүлүнө карата зомбулук көрсөтүү) боюнча кылмыш иши козголуп, убактылуу кармоочу жайга киргизилди", - деп айтылат Бишкек ШИИББинин маалыматында.

Тергөөнүн жүрүшүндө, кылмышка шектүү Т.К. Экономикалык кылмыштуулукка каршы күрөшүү боюнча мамлекеттик кызматтын кызматкери экени белгилүү болду.