Гүлжан Кулмамбетова: "Мага карата айтылган "токол" деген сөз топтой тепкиленип, таланып-тытмаланып, эч нерсеси деле калбады"

"Ала-Тоо" программасынын диктору Гүлжан Кулмамбетова социалдык тармактагы баракчасы аркылуу коомчулукка кайрылды. Ал анда Жогорку Кеңештин депутаты Камчыбек Жолдошбаевдин басылмалардын бирине берген интервьюсунда анын дарегине карата айткан кептерине жооп жазууну туура көргөндүгүн белгилеген.

"Кулак укса, курсак кайнайт" демекчи, ал кишинин телефонун таап "эмнени айтып жатасыз?" деп кайрылдым. Камчыбек ага (улуу киши эмеспи) интервьюда "сен жөнүндө сөз болгон эмес, бул кайраштыруу" деп жооп берди.

Замандаштар, менин дарегиме айтылган "токол" деген сөз топтой тепкиленип, таланып-тытмаланып жатып эч нерсеси деле калган жок. Бул бир Жараткандын жазмышы. Ким кандай десе өз эрки.

"Ээсин сыйласаң, итине сөөк сал" дейт кыргызда. Аскар Мааткабыловичтин тарапташ, тамырлаш, тагдырлаштарына урматым бар. Жазмыш экен эже (ред. Аскар Салымбековдун жубайы Гүлмира Мамбеталиева) ооруп калды. Амандыгын, сакайып кетишин Кудайдан тиледик. Узак жылдар илээшкен илдетинен арылууга жандалбастаган ал кишинин абалын, жакындарынын тарткан азабын эч кимдин башына салбасын. Арбакты сыйлайлычы, тынч жатсын.

Ал эми тирүүлөрдүн тиреши болсо аялдарды аралаштырбай, эркектерче эсептешип алышса дейм. Каралоо - бул бир тууганынын этин тамшана жегенге барабар экенин Камчыбек ага билсе керек. Ал эми аны жайылтууга жандалбастагандарды Кудайга койдум. Башым аман, бүлөм бүтүн, жүрөк тынч. Абийирдин алдындагы абалым айыңдардан арачалап турат. Жакшы күндөрдүн жаркын учурларын жар сала, Жараткандан жакшылыктарды тилейли!" - деп жазган диктор.

Ал эми жогорудагы посттун жазылышына түрткү болгон Камчыбек Жолдошбаевдин маегинде "Кулмамбетова башында мага келип жүрчү. Кийин Салымбековго тийип, токол катары жашап кеткенде менин аяшым Гүлмира катуу кайгырган" деп жарыяланган.